صحاب-2

لقراءة أفضل راجع أصحاب


تررن تررن
أحمد: ازيك يا حلاوة
عمرو: ازيك يا ميزو اخبارك ايه
أحمد: تمام و الله كله فى الاوك. ده انا كنت بكلم الواد حسنى ف بيقولى انك عيان جامد
عمرو: اه و الله يا حماده جالى دور برد و سخنية بقالى 3 شهور
أحمد: لا سلامتك يا جميل
سكوت
أحمد: عامة انا نازل الخميس اللى جاى كده كده دبى هازور اهلى و اقابل كام واحد و العب بلاىستيشن و نينتاندو. ابقى خلينا نشوفك بقه
عمرو: ان شاء الله يا باشا
أحمد: طب مش عاوز اى حاجه من ابو ظبى
عمرو: .....
أحمد:اى حاجه والله يا معلم محتاجها من ابو ظبى بس قولى انا كده كده جاى دبى يعنى علشان النينتاندو
عمرو: لا يا باشا تسلم الله يخليك
أحمد: طب انا بص اصلى فى الموقع هاقفل معاك و اكلمك بعدين
عمرو: ماشى يا باشا قشطة يالا سلام
..............
بعدها بيومين
...............
تررن تررن
عمرو: ألو
محمود: الو ازيك يابنى عامل ايه
عمرو: تمام يا حوده و الله
محمود: اصل انا كنت قاعد امبارح قاعد زهقان على النت بشات مع 734 واحد و فجأة لقيت حمادة الخرتيت طلع اونلاين و اعدت اشات معاه ساعة و نص و هو طالع لقيته بيقولى ده اخوك عمرو عيان قوى و بتاع
عمرو: اها و الله يا حوده اخدت دور جامد المرادى
محمود: مممممم لا حول الله, و ده من ايه ده يابنى هو انت قابلت اسامة و لا ايه
عمرو: لا و الله يا حوده ده انا حتى قافل الشبابيك كويس
محمود: لا يابنى الف سلامة و الله
عمرو: الله يسلمك يا باشا
محمود: طب مش عاو اى حاجه يابنى اعميلهالك. انا صحيح فى مصر بس لو عاوزنى اعملك اى حاجة
عمرو: تسلم يا باشا بس هاتعمل ايه يعنى يا حودة
محمود: لا و الله انا بتكلم بجد يعنى لو عاوزنى احدثلك الفيسبوك بتاعك او اعملك تشاتنج مع اى حد لحد ما تقوم بالسلامة ان شاء الله
عمرو: الله يخليك يا باشا بس قاطعين النت و الله
محمود: لا حول الله يا رب و كمان قاطعين النت. معلش يابنى و الله مش عارف اقولك ايه
عمرو: الله يخليك يا باشا. يالا يا حوده علشان ما طولش عليك
محمود: خلاص يابنى مع السلامة
عمرو: سلامة
.......................
بعد 4 ايام
...................
تررن تررن
عمرو: الو
هشام: عمووووووووور ازيك يابنى عامل ايه
عمرو: أتش ازيك يا باشا واحشنى جدا
هشام: و انت اكتر و الله يا عمور الف سلامة عليك
عمرو: الله يسلمك يا جميل. ده انت عرفت منين
هشام: ده انا كنت على النت و قابلت محمود و قعد نص ساعة يكلمنى على الغربة و ...
عمرو: غربة ايه يابنى هو مش محمود فى اسكندرية
هشام: لاااا هو انت ما تعرفش
عمرو: لا و الله فى ايه
هشام: مش نقل من اوضته للأوضه اللى جنبها
عمرو: لاا يا راجل ده امته حصل الكلام ده
هشام: من كام يوم و حالته صعبة خالص والله الواحد زعلان علشانة و خاصة ان الاوضه الجديدة مافيهاش كنبة
عمرو: أووووه لا حول و لا قوة الا بالله ليه كده بس
هشام: والله الواد ده حظه غريب
عمرو: اه و الله ربنا يصبره ان شاء الله عامة كام يوم بس و ان شاء الله هايتعود على الاوضة الجديدة
هشام: يا رب
عمرو: ماشى يا أتش مش هاطول عليك
هشام: لا يا باشا و لا يهمك انت المهم تقوم بالسلامة ان شاء الله
عمرو: ان شاء الله يا جميل. الف شكر يا أتش يالا يا باشا سلام
هشام: سلام يا عمور و خلى بالك من نفسك
عمرو: و انت كمان يا أتش سلام