Falling Slowly - Glen Hansard and Marketa Irglova (Once)

و ان مر يوم من غير رؤياك..

-------------------------------

سفينة كبيرة فى وسط المحيط. المايه على مد البصر من كل الاتجاهات. ناس كتير واقفين على السطح. واقفين ساكتين كأنهم فى عالم تانى، ما حدش بيبص لحد و لا بيتكلم، كلهم باصين ناحية المايه. المحيط كان هادى فى اليوم دة.

---------------------------------------

فاكر لما مرة طلعت رحلة تخيم لوحدى. رحت عند أبعد نقطة على الحدود مابين الامارات و عمان، كانت ده أقرب نقطة من المحيط الهندى. بعد ما نصبت الخيمة، قعدت شوية مبهور بشكل السما؛ فوقيا كان مهرجان نجوم.

 السما فعلاً كانت منورة بس بالنجوم. نجوم كتير بكل التشكيلات و المجموعات اللى أعرفها و اللى ماأعرفهاش. كنت سامع صوت الموج بيضرب على الشط و يرد تانى. كنت شفت و قربت من المحيط الاطلنطى لما كنت قاعد فى فندق بيبص عليه فى كوناكرى و نزلت فعلياً فى وسط مضيق هرمز قبل كدة بس ده كانت أول مرة اكون قاعد على شط المحيط و فى الوقت ده من الليل. 

 صوت الموج بعد شوية سيطر على كل حاجة تانية: كنت بسمع الموج بيضرب على الشط و يكمل صداه جوايا قبل ما يرد تانى عالمايه. 

قعدت مسحور الله أعلم قد ايه و بعدين قررت انزل. كانت الساعة تقريباً قربت من اتنين. انا متعود أنزل البحر بليل سواء ايام اسكندرية او الخليج فى دبى بس المحيط مختلف تماماً عن البحر، كبير بتوحش. مسيطر و غامض بشكل غير طبيعى اول ما نزلت حسيت برهبة و كل ما ادخل جوة اكتر الرهبة ده زادت و حسيت ان الكائن الخرافى ده ممكن يطلع منه اى حاجه. 

طلعت على طول و ما طولتش و مانزلتش تانى الا لما الدنيا نورت على خمسة و نص كدة.

----------------------------------

There's a kid who had a big hallucination.

-----------------------------------

حوت أحدب كبير بيظهر واحدة واحدة. راسه أول حاجة بتظهر من تحت المايه. راسه كبيرة و فى أخرها بتظهر عنين شايلة حزن و ارهاق الى شافه في ال 150 سنة اللى عاشهم. بياخد نفس بيطلع به نافورة هوا و بينزل ببطء تانى.

بيطلع فجأة لحد ما بيظهر اكتر من نص جسمه فى سطح الماية بشكل شبه عمودى قبل ما يهبد نفسه بقوة على سطح المحيط و يختفى مرة تانية.

-------------------------------------

و يوم ما تسعدنى بقربك.. ألاقى كل الناس أحباب.

---------------------------------------

الموج بيعلى فجأة و السما بتغيم. المشهد كله بيتحول للرمادى و السفينة بتبان من بعيد مش واضحة قوى. من غير اتفاق، الناس بترمى نفسها بشكل تتابعى من على السفينة.

------------------------------------------

and if I show you my dark side.

would you still hold me tonight.

and if I open my heart to you and show you my weak side.

What would you do?

-----------------------------------------

- بابا، انت عاوز تلعب معايا؟

- اه يا يس.

- هاتلعب قد ايه؟

- كتير.

- يعنى انفنتى لعب؟

- اه.

- :) تحب تلعب معايا بوكس بوكس و لا نرسم؟

------------------------------------------