Tomorrow to Uganda for the next 4 days. First time for me in East Africa!
السبت، أغسطس 31، 2013
الأربعاء، أغسطس 28، 2013
تلات سلامات يا واحشنى
تلات أيام...
*******************
يَس بقى بيحب Angry Birds قوى. كل حاجة عنده بقت Angry Birds. هو أصلاً بقى شبه ال Angry Birds. و أى لبس لازم يكون عليه Angry Birds. و ايه، عارفهم واحد واحد: الأحمر و الأصفر و طبعاً الأزرق اللى فيه منه Ice Angry Birds المرسوم على البيجاما بتاعته اللى لو مغسوله، بنبقى كلنا بندعى ربنا انها تنشف بسرعة علشان يَس يلبسها و نرجع نحس بدفء ال Angry Birds تانى فى البيت.
من كام يوم لقيت يَس بيقولى أنت تعرف الحكاية بتاعة ال Angry Birds ايه؟ هو ليه Angry مش Happy؟ و هو طول عمره هايفضل كدة Angry و لا هايبقى خلاص Happy؟
*******************
بعادك يا جميل طوّل
و ده أول بعاد بيطول
*******************
فريدة بقت مشكلة. عاوزة تعرف كل حاجة و بتسأل على أى حاجة، ليه و بتعمل ايه و لبست البنطلون ده مش ده ليه و كنت فى الحمام بتعمل ايه.
كل يوم الصبح و انا نازل الشغل لازم تقولى هاتلى شوكلاته بيضه. ده شوكلاته من Kinder على شكل بيضه مقسومه نصين، نص فيه شوكلاته و النص التانى فيه لعبه بلاستك بس قطع صغيرة لازم تركبها على حسب الكتالوج الصغير اللى بيجى معاها. بنقعد نركبها سوا و نلعب بيها ساعة بالكتير قبل ما تتكسر او تضيع.
بس فريدة بقالها فترة مش طويلة: بعد ما تفكرنى بالشوكلاته تقوم باصه لى باصه كده انا عارفها و فاكرها من زمان و انا صغير و تقولى "أوعى تتأخر".
*******************
عرفت الوحدة ايه هيا
و ايه أيامى فى بعادك
و شوفتك هانت الدنيا
و لا فكرت فى عتابك
و أعاتبك ليه و أنا بجبك
و أقولك ايه و أنا بجبك
يا مالى الدنيا فى عنيا
تلات سلامات و شويه
تلات سلامات
بإيدى سلام ... و عينى سلام
و قلبى سلام.
------------
الكلام باللون ده من كلامات أغنية تلات سلامات من تألف مرسى جميل عزيز
الثلاثاء، أغسطس 27، 2013
للتأريخ:
مبضون جداً من عمرو سليم اللى كنت بشوفه نقى و بتابع رسوماته على طول من ايام الدستور القديم مروراً بالمصرى اليوم و الشروق.
عمرو مش شايف غير الاخوان "الارهابيين" و قطر و ابو تريكة و "مصر رجعت تانى لينا" و مش شايف الخره اللى مجتمعنا بقى فيه و مش شايف كم الكراهية اللى فى نفوسنا تجاه نفسنا و مش شايف القفا المجنح اللى اخدناه بعوده القمع و زوار الفجر. بجد خسارة.
الأربعاء، أغسطس 21، 2013
الاثنين، أغسطس 19، 2013
الأحد، أغسطس 18، 2013
طب شوية حقائق جنب بعضها كده يمكن تساعدنى أفهم شوية:
1- بداية الشرخ كان فى الاستفتاء الملعون بتاع 19 مارس 2011 اللى كانت جهة فيها الاخوان و الاسلاميين و معاهم (و يا محاسن الصدف) المجلس العسكرى الموقر اللى السيسى كان أحد اعضائه. الاستفتاء النجس ده بتاع غزوة الصناديق و قالت الصناديق للدين نعمممم كان نقطة البداية ان المصريين يقفوا ضد بعض بشعارات تكفير و تحقير.
2- فى نوفمبر 2011 حصلت أحداث محمد محمود اللى الشرطة قتلت فيه عدد كبير من الثوار و كان موقف الاخوان مخزى لما باعوا الثوار و رفضوا النزول بحجة انهم حاسيين ان ده فخ و من خلال مجلس الشعب أعلن الكتاتنى "لقد أخطرنى الان وزير الداخلية انه لم يطلق خارطوش على المتظاهرين" و سقفله الاخوان و بقيت تيارات الاسلام السياسى و ظاط بعضهم تحت صمت الاخوان ان اللى فى محمد محمود دول مدمنين و بيتعاطوا ترامادول و لازم الشرطة تخلص عليهم. جدير بالذكر ان من غير الضغط اللى حصل عالمجلس العسكرى فى محمد محمود كنا ممكن زمانا لسه فى خارطة الطريق بتاعة طنطاوى.
3- ديسمبر 2011 فى أحداث مجلس الوزراء و تعرية ست البنات تحت تعليقات سافلة من الاخوان و الاسلاميين من نوعية (دول مش عاوزيين الاستقرار - أجندات خارجية - و هيا ايه اللى وداها هناك).
4- فى انتخابات الرئاسة و فى الجولة الأولى مايو 2012 حصل محمد مرسى على 5.7 مليون صوت قصاد 5.5 مليون صوت لشفيق. الفرق البسيط ده (260 الف صوت) كان مرجح انه يروح لصالح شفيق فى الجولة التانية بعد ما ناس كتير فقدت اى ثقة فى الاخوان. و هنا ظهرت حملة عصر اللمون مصاحبة لوعود و تصريحات ان مرسى هانعرف نشيلة لو ماعجبناش و وعود مرسى بالقصاص لدم الشهداء و بعمل لجنة الدستور من كل التيارات لاخراج دستور توافقى و كل ده أدى لتشكيل" الجبهة الوطنية لحماية الثورة" اللى كان فيها حمدى قنديل و وائل غنيم و وائل قنديل و علاء الأسوانى و اتفاقهم مع مرسى فى مؤتمر فيرمونت و ده خلى ناس كتير تأييد مرسى فى أول حكمة. (انا بحمد ربنا انى ابطلت صوتى فى الجولة التانية).
5- الشرخ التانى فى المجتمع المصرى كان فى قرار محمد مرسى انه يعرض الدستور للاستفتاء الشعبى بعد ما انسحب من اللجنة جهات كتير و نزل بسببه دم على اسوار الاتحادية.
6- مرسى كان رئيس فاشل و غير قادر على جمع شمل المصريين. بالعكس كان بيفرقهم اكتر بخطاباته اللى للأهل و العشيرة و مؤتمراته اللى بتحض على الفتنه ضد الشيعة و غيرهم. ده غير انى شخصياً كنت بحس بالعار لما بشوف ايا من خطاباته اللى مستواها الفكرى او الكاريزمى او الثقافى متدنى جداً و كنت دايماً بقول للناس اللى حواليا انه بغض النظر عن اى شيئ فالتاريخ دايماً هايفتكر ان المصريين فى اول فرصه حرة للاختيار اختاروا محمد مرسى.
7- طوال مدة مرسى كان واضح الفشل و العشوائية فى اتخاذ اى قرار لدرجة ان المستشاريين بتوعة اللى من برا الاخوان (و حتى اللى متعاطفين منهم مع الجماعة) استقالوا و النائب بتاعوا استقال هو كمان و كلهم انكروا عليه قراراته الهطلة اللى نزلته هو و جماعته الارض و منها الاعلان الدستورى الديكتاتورى.
8- الاخوان كجماعة و كقواعد شعبية نجحت انها تكره الناس فيها عن طريق الخطاب الاستعلائى الاستفزازى من نوعية (موتوا بغيظكم و مرسى حارقكم و التصوير بالزيت و السكر مع الابتسامة البلهاء المستفزة) و غيره من خطابات تكفيره اقصائيه من نوعية (اعداء المشروع الاسلامى - اعداء الدين و الليبرالية ان امك تقلع الحجاب).
9- ظهر تخاذل مرسى فى تطهير الداخلية اللى قال عنها انها فى القلب و انها شريك فى ثورة 25 يناير و كمان ظهر عجزه عن ادارة مقدرات و موارد الدولة و فشلة فى صد و منع المؤامرات اللى قال انها السبب فى ازمات الكهربا و البنزين و غيرها.
10- مرسى كان لازم يمشى علشان البلد و علشان الاخوان كمان.
11- الاعداد الكبيرة (جداً) اللى نزلت فى 30-6 ماكنتش مفاجأه و كان بيتجهزلها من فترة بحشد من الاعلام و ممكن تواطئ من الجيش لو عاوز بس الاكيد ان كل دول ماعملوش حاجة غير استثمار غضب الشعب.
12- البرود و التناحة اللى استقبل بيهم مرسى الملايين اللى فى الشارع و خطابه الفارغ بتاع انا الشرعية بيؤكد انه كان منعزل تماماً و ما بيسمعش لأى نصح.
13- الجيش فى 3-07 اتدخل لصالح جهة ضد جهة و اهمل الاصوات اللى راحت الانتخابات و اللى حصل ده مالهوش اسم غير انقلاب.
14- انا كان وجهة نظرى ان يستمر الضغط اللى فى الشارع لحد ما مرسى يمشى و بالتأكيد ماكنش هايعرف يستخدم الداخلية و لا الجيش فى القمع لأنهم مش معاه اصلاً (كانوا نفعوا مبارك!!).
15- احداث الحرس الجمهورى مذبحة مسؤول عنها الجيش و الشرطة هيا و احداث المنصة.
16- مسؤولية الدولة (السيسى دلوقتى) حماية الموطنين. القتل اللى حصل فى بين السرايات و الاعتداء عالكنايس و توريع المسيحيين فى رقبته و مسؤولية وزير الداخلية القبض عالمجرمين و تقديمهم للعدالة.
17- اللى حصل فى رابعة و النهضة و ما بعدها عار عالجيش و المذبحة فى رقبة السيسى.
18- الاستهزاء و الشماته فى الموت و الدم من شيم الوضيع عديم الاصل.
19- لو الاخوان باقى عندهم اى ذرة من حب او خوف عالبلد و على دم المصريين، يطلعوا دلوقتى يقولوا انهم هاينسحبوا من الشوارع حتى لو شايفيين انهم على حق علشان المعركة مش زى ايام مبارك ما بين شعب و مؤسسات دولة فاسدة، المرة ده فى شعب فى الطرفيين و طرف منهم معاه جيش غشيم بيقتل شعبه و شرطة لسه وسخة. و يقولوا انهم فى سبيل ان المصريين ما يقفوش قصاد بعض، هما بيفضلوا يكونوا الطرف المنسحب (منسحب من قدام طرف الشعب التانى مش من قدام الدولة و بطشها).
على جنب:
د. المصطفى حجازى: أخصصصصصصصص!!