الاسبوعين اللى فاتوا بتوابعهم لسه هايفجروا دماغى قبل ما انا افجرها قريب

قررت ارجع مصر تانى تانى تانى راجعين للغم تانى بس لإما كده لإما استبعد الدين من حساباتى و اقضيها النسوان و الخمرة لبعضيها و كمان لو اعدت هنا هاضطر انى اظلم انسانة بحبها مش انا طبعا اللى هاظلمها بس الظروف هاتخليها تاخد قرار هيا مش قده دلؤتى و متهيألى هايكون سبب للفرقه فيما بعد لما تتضح خطورة الحاجه اللى عملتها

جميل جدا و الديك بيدن يبقى هاترجع مصر يا وحش

اه والله هارجع بقه هاعمل ايه يعنى

طب جميل امال بتونُون على ايه

بونُون ؟؟؟

ايه ايه عم بونُون ده انت حشاش و لا ايه

(شخرة اسكندرانية مطولة لتنهى هذا البيضان)

طب دلؤتى الوضع كالأتى

لإما اروح شركة كبيرة قوى حاجه من اكبر 3 شركات فى المجال بتاعى عالميا بس للأسف الفرع اللى فتحينه فى مصر شغله روتينى و بيضان الصراحة بس هاخد مرتب ظريف جدا و اسم كبير جدا

لإما أروح شركة نظام شغلهم ممتاز و المستقبل بتاعهم و الحاضر كمان انهم بيكبروا بسرعة جدا ده غير انى كان ليا سابق شغل مع الشركة ده ايام ماكنت فى مصر و بشتغل بدوام جزئى ايام الجيش و الراجل اللى ماسك الشركة هوه حاليا الوحيد اللى انا بحترمة تقنيا فى المجال بتاعنا و هوه كمان كان بيقولى خليك معايا

طب ماهى العملية باينة زى الحجر الدوبل فى الليلة العمياء

يعنى قصدك اختار ايه

(موسيقى حزاينى)

يعنى مش عارف تختار يا رأفت

(احاا اسكندرانية مطولة ايضا)

المشكلة الاساسية انى بكتب الكلام ده هنا من الواضح ان دماغى تلفت على رأى واحد اعرفه

او انى فعلا فقدت طرق التواصل مع كل الناس اللى بحبها

تخاريف

نظرية التبسيط و الخطوط المستقيمة التى كنت افكر بها خلال الفترة السابقة وان كانت من اكثر النظريات التى تبنيتها اراحة لى و لعقلى الا ان ضميرى غير مستريح بالمرة لها
النظرية تقول ان الله القوى خلق عباده الضعفاء الذين هم نحن و امرهم بفعل مجموع من الاوامر و الابتعاد عن مجموعة من النواهى من يعمل الاوامر و يبتعد عن النواهى سيدخل الجنة و الاخر سيصبح مع الناس التانيين

بالطبع النظرية يوجد بها بنود للأشياء الكثيرة الغير مفهومة و تعالجها بأن يجب ان تسلم كل الامور لله ولا تسأل فقط عش حياتك و دع القلق و افعل ما تفعله بأفضل ما يمكنك من الاداء و كل ما يحترق عقلك لمعرفته ستعرفه فى حينه يوم القيامة يوم نلقى الله جميعا.

انها تطبيق لنظرية الثواب و العقاب و العبودية لله المستحق العبادة بلا أدنى شك.

و لكن, و ماذا عن كل الوساوس الخبيثة التى تجرى فى عروقى و عقلى و روحى مثل النار عن اصلاح الفساد و تحرير فلسطين و اصلاح العباد و تطبيق الشريعة التى انزلها الله على سيدنا محمد (ص) لكى يخرج العباد من عبادة العباد الى عبادة رب العباد.
و العبادة هى الاساس فى الخلق
<و ما خلقت الجن و الانس الا ليعبدون>

و الناس من حولى يعبدون كل شئ الا الله او هكذا أرى.

و لنرجع لنظرية التبسيط أو للقران او للتأملات و كلها وجهة نظر شخصية بحته عن معنى كلمة العبادة و هناك الكثير من التفسيرات اقلهم تصديقا و قوة فى الاقناع ان عبادة الله هى تطبيق للعبادات التى اتى بها الدين من صلاة و زكاه وحج و ما الى ذلك و لكنى و للأسف غير مقتنع بهذا التفسير ويا ليتنى اقتنعت به لكانت حياتى الان افضل بكثير.

والبحث عن معنى الوجود و الغرض من الحياة و ما الى ذلك من الافكار و التاملات التى تجعلك تشيخ قبل الاوان و تفقدك متع الحياة الدنيا و احيانا تأخذك فى الاتجاه الذى تفقد به الدنيا و الاخرة معا و لكنها تجرى فى عروقك نارا و لهيب مستعر و لا يطمأنك الا ان فى ذلك بحثا عن الله فى كل شئ من حولك و داخلك.

هذه المعانى ابحث عنها طوال حياتى للإجابة على سؤال واحد ماذا يريد منى الله ان افعل.

و هنا جاء دور نظرية التبسيط و الخطوط المستقية لجعل حياتى ابسط و اسهل لأنها ببساطة تلغى هذه الافكار و تقول لى عش حياتك يا فتى فقط اطع الاوامر و اجتنب النواهى و حاول ان تصلح من نفسك و من ترعاه و ان حدث و ارتكبت معاصى فأن الله رؤوف رحيم يغفر لمن يشاء من عباده.

انا لا اشكك و لو للحظه فى ان من يأخذ بهذه النظرية عن اقتناع سيكون بذلك حقق الاجابة الصحيحة عن السؤال ماذا يجب ان أفعل و هو السؤال الرئيسى فى هذه الحلقة.
و لكن و لأانى ميقن تماما بأن الحياة ما هي الا ادوار و مواقف يضعنا بها الله فأنا و للأسف أرى لنفسى دور اخر

اظاهر ان انا لازم امشى بقى
سلام

انا لسه مخلص رواية صالح هيصة لخيرى شلبى من شوية

مش فاكر ان انا عيطت بالطريقة اثناء قراءة حاجة الا و انا بقرأ الواجهة ليوسف عز الدين عيسى

لا أعرف تحديدا متى فقدت القدرة على المشاركة و ارتضيت فقط بالمشاهده و الاستمتاع

هذا هو الضابط إسلام نبيه مغتصب قسم بولاق الدكرور انا لسه شايف صورة النجس ده فى موقع الوعى المصرى و انا مع كلام وائل انه لازم يتفضح زى ما وزع صورة عماد.

و الصراحة انا شايف تماشيا مع قانون الطوارئ ان الشعب يرجع يطبق شريعة حامورابى يعنى اى كلب من الشرطه يعمل حاجه المفروض تتعمل فيه و مش كفايه

معلش يا صاحبى بس لما افتكرت مواقفك معايا و عدم فهمك ليا او حتى محاولة ايصال الشعور ده كنوع من اختبار قوة العلاقة اتبضنت قوى
غوور فى 60 داهيه