هل عدم الشعور في المطلق ده شيء مقيد للاستمتاع المؤقت من فترة لفترة؟ او بمعني تاني لو الإنسان بيحس بلذة ما من فترة و فترة هل معني كدة انه بيحس؟
يعني بطريقة رياضية؛ هل الاحساس انالوج و لا ديجيتال، رسم بياني متصل و لا لقطات متفرقة احنا اللي بنوصل ما بين النقطة و النقطة علشان نرسم شكل حياة مش موجودة؟ و في الحقيقة ما بين كل لحظة احساس و التانية فجوة زمنية من ثواني لحد سنين علي بال ما نحس تاني، و كونها زي ما تكون ثقب اسود، ما بنحسش عدي اد ايه من ساعة النقطة اللي قبلها الا لو حد فاكرنا؟
طب و هو الإحساس علي خط او منحنى متصل افضل؟ يعني لو لو افترضنا الزمن كمحور افقي و الاحساس محور رأسي، هل المنحني النازل لتحت علي طول احسن من مجموعة نقط متنورة ما بين فوق و تحت، و اللي لما بتوصل مابينهم، يمكن بيديلك شكل عشوائي لشعورك في الدنيا بس مش مستقر في الهبوط؟
طب و هل الناس لاما انالوج لاما ديجيتال؟ يعني هل لو واحد حياته خطوط و منحيات مابيبقاش فيها جزء نقط و ثقوب سودا ما بينها و بعدين يكمل خطوط مستمرة مرة تانية، و بالعكس؟
طب و هل احنا متأكدين حياتنا انه ؟ يعني ممكن لو حد فاكر حياته و إحساسه بالحياة خطوط و منحيات مستمرة ، يطلع اصلا مابحسش الا من اللقطة للتانية و بيغوص ما بينهم في ثقب اسود بيفقد فيه الزمن و لما يرجع يحس تاني ، يفتكر انه بيكمل الخط؟ و واحد فاكر ان حياته لحظات متفرقة ، يطلع بيغرق في التفاصيل ما بين النقطة و التانية، التفاصيل اللي بتربط اصلا ما بين اللحظتين، و يطلع إحساسه مستقر و مرسوم علي منحني ثابت؟
او يطلع الاتنين واحد اصلا؟