حاجة غريبة

ليه زعلت أوى لما شفت علمنا متركب بالمعكوس. لدرجة انى مقدرتش استحمل المنظر و رحت عدلته. رغم انى لو حد حكالى او قريتها ماكنش الموضوع هايفرق معاياه خالص.

عن هؤلاء الذين لا وجود لهم

عن هؤلاء أكتب, الذين لا وجود لهم فى العالم الحقيقى الذين يعيشون فى عوالمهم النفسية فقط متوحديين مختبئين خلف عبثية الفكرة و عبث المشاعر و الافكار دون أن يدركوا أن الحياه أقصر و أبسط من غزل عقولهم و أرواحهم عن هؤلاء أكتب, الذين لا يعملون , لا يؤثرون بل هم دائماً و أبداً مفعول بهم أو فيهم فدائماً الظروف و الاقدار و الرب. فدائماً يجدون الاعذار لعدم الفعل, لعدم التأثير و يكتفون من الحياه بإقناع أنفسهم بأنهم الاسمى و الارق و الاقدر على الفهم و يشفقون عليك فأنت لا تدرك معنى الفكر الحقيقى و المعنى الحقيقى للحياه فأنت يا ولدى مخدوع فى تلك الحياه حتى النخالة. كلهم خدعوك بداية من الرب و الاهل و الاصدقاء فلا يوجد اى شىء حقيقى فى عالمهم و يعيشون على فكرة الخداع و الشك و نظرية المؤامرة و تمضى بك الايام و الشهور و تجد سنوات مرت و انت لم تحقق أى شىء غير غزل العنكبوت الذى يملاء رأسك و روحك

لا أدرى حقيقة, و لكنى أمضيت فترة كبيرة من حياتى مع هؤلاء فى البعد الهش الغير مرئى و لكن بمجرد ان اتيحت لى الفرصة ان اعيش و اتعايش مع الحياة بكل ماديتها و قسوتها و جمالها و بساطتها وتعاملت مع اشخاص من الخارج ووجدت ان مساحة الفكر و التأمل موجودة و محفوظة طالما تستمتع بها و تعطيك بعدأ تحب ان تتواجد فيه و لكن أيضاً يوجد ما تفعلة, ما تنتجه و تكون بارع فيه فأنت تعيش فى العالم الحقيقى و ليس فى عوالم تخيلية. و اذا كان هروباً من الواقع فالأواجهه أو أغيره فهى حياتى و لا تدع أحد مهما كان يؤثر عليها بل دع مفاتيحها و كلها معك. انزع خيوط العنكبوت التى تشرنقت داخلها فى بيات نفسى دائم

ولادة متعثرة

صوت مكتوم
طالع من جوة قلبى
فيه بحة ألم
بيبشربالمولود السعيد
اللى إستنيته كتير
عقلى و روحى بيتخانقو عليه
عقلى يقول
حيبقى كلام
كلام فى الهوا
لا يضر ولا ينفع
خلينا جنب الحيطة
وبكرة حيكبر
ويبقى شعارأو مانشيت
والناس تمشى وراه
وقلبى يقول
لأ ...........شِعر
المولود حيطلع شِعر
كلام بجد
أحاسيس بشر
ولما يكبر
حيبقى تاريخ
عقلى رفض
وشجب واستنكر
وأعلن إنه الإله
الأمر الناهى
وأن المولود كلام
فمُت أنا

أجيال الشاى باللبن

مع انى ما بطيقش الشاى باللبن سواء المشروب او الحياه عامة اللى ملامحة مش واضحة و بفضل اتكلم كتير و لازم الواحد يكون مُحدد و بتاع و شاى بالنعناع, بس لما بالصدفة امبارح مسكت الجريدة القومية المنيلة بتاعتنا و قريت الكلام اللى كتبينوه عن نجيب باشا محفوظ فى عيد ميلاده اللى مش عارف كام كده. كان عمال بيحكى انه فضل يعربد (نسوان بأه و مسخره) على حد تعبيره "العربده الكامله" يعنى زى الجريمة الكاملة كده و بعدين بأه لما وصل من العمر أرذله (42 عام من السيكو بيكو المتين) قرر انه يتجوز بتقوله ايه يا ولاد يتجوز (كنت هاشخ* له) المهم المعلم بأه كاتب انه تزوج من السيده حرمه اللى شاف فيها نموزج الست اللى هاتعرف تساعده على الكتابه و التركيز فى عمله و تراعى بيته و خلال حكاياته عن الحب الحب و الشوق الشوق من ايام ما كان عمره 9 سنين ما جبش سيرت مراته لدرجة انه قال ان اعظم قصه حب حصلتله و هوه عنده 17 سنه لما اعد يعاكس واحده فى المترو (اظاهر انها كانت جامدة) و بعد كل الكلام ده ال * راميط بتوع صفحة المرأه فى الاهرام افاضوا فى القول ان نجيب محفوظ انصف المرأه و مش عارف ايه كد الصراحه أحييييييييييييييه يعنى بس ده مش موضوعنا.

المهم انا بعد ما قريت الكلام اللى كنت عارفه قبل كده لأنى من عشاق كتابات نجيب محفوظ بس الكلام داس على الجرح أهى هيه دى الناس اللى مابتحبش الشاى باللبن و الا بلاش الصراحه يعنى نموزج. الراجل لما قال يا حب و عواطف مشى مع بنات و قابل و كتب جوابات و عذابات الحب و لما قال يا مسخرة نام مع نسوان و شرب و عربد و حشش و اتكيف و لما قال يا تمرد قال مفيش ربنا و رفض المبدأ من أساسه و بعدين قال يا توبه تاب و اناب و اصلح و صلى و كتب صوفى و اقترب لما رأى الإيمان الكامل و لما قال يا هدايه اتجوز.

اما احنا بقى الجيل المبارك اللى اتعرفنا على الحب عن طريق القصص و الروايات و الافلام و رنات الموبيل و عرفنا الجنس من خلال الافلام و الصور و العادة السريه وعرفت الدين من الشرايط و الداعية العصرى حتى لما جينا نتمرد قلك ربنا .. ربنا حلو و موجود بس النبى ده مش عارف ايه و اللى قلك ربنا موجود بس انا مش عاوز انفذ كلامه او فى قصور مش عارف كده فى ايه. المهم انه مافيش حد عاش التجربة لأخرها أو راح لأسود أو أبيض كله عايش فى منطقة ضبابيه غير محدده المعالم. محدش عاوز يفتح باب أى من الاتجاهين كله واقف فى منطقة الشاى باللبن الاعظم عمال يجري يوارب الباب الشمال شويه و يتفرج على العالم المسحور و اللذيذ و بعدين حاجه كده جواه تنأح عليه يقوم جاى جرى قافل الباب و يجرى يوارب الباب اليمين و يتفرج شويه و روحه تستريح و يعيش لحظه نقاء و شفافيه و بعدين روحه تمل و يفضل على الحال ده لا هوه محصل لا ده و لا ده و مكتفى بكوباية الشاي بالبن اللى معاه.