الطريق الى الله بعدد انفاس الخلائق

يا رب
و انت اعلم بى من نفسى
ارحمنى يا الله
انا معرفش ليه بيحصل كل ده
و طول عمرى تاعب روحى و عقلى علشان افهم
و موصلتش لحاجة
ساعات بتوه منك و يمكن بدخل يمين او شمال و الدنيا و المعاصى بتاعتى تحجب نورك وتهيألى نفسى انه مش موجود
و ترجع تريهونى تانى علشان ارجع وساعات برجع و ساعات بخاف ارجعلك علشان عارف انى هاتوه تانى فخاف تزعل منى
يا الله
انت وحدك تعرف انى بعمل اى خير علشان بحبك
مش علشان عاوز ادخل الجنة او خايف من النار
و انا معرفش ده يزعلك و لا لأ
بس انا فعلاً كل اتجاهى الدينى و كل مشيى فى الخير فى الدنيا علشان بحبك
و بلاقى فى حبك المعنى اللى بعرفه للحب
يمكن هوه ده اللى مبوظ علاقات كتير عندى
انى فاكر ان هوه ده لحب اللى المفروض انه يكون موجود بينا بين الناس
لماتحب من غير سبب لما الحب يبقى نور يضوى قلبك و روحك لما تعرف ان الللى بتحبه هوه كمان بيفكر فيك فى كل وقت و انه مهما عمل فلمصلحتك و انه طيب معاك و مع غيرك لان اللى بيحب ماينفعش يكره او يبقى مش كويس مع اى حاجه تانيه و ان حبه ده مغلف الوجود اللى حواليه كله
و انه بيضحى و يبذل كل شء علشان اللى بيحبه
بس كتير ما بفهمش تسييرك للأمور و بتعب قلبى علشان افهم
و غرورى بيخلينى اقتنع بالحلول اللى بجابها
و فى غز الغرور و العناد
بيبقى فيه طاقة نور صغيرة فى روحى بطمنى انك انت اللى خلقت العقل ده و هاتسامحه على انطلاقة و انك عاوزة يفكر و يفسر علشان يوصلك
علشان يلاقيك بجد مش عارف انك موجود و سايبك
ايوه بيسمع كلامك و ينفذه بس مش عارفك و لا شايفك فى اى حاجه من اللى حواليه
ساعات بحس انك بتفتحلى اكتر من باب من النور ده علشان اشوفك و الاقيك من طرق كتير
من كل الطرق
الحب القوة الضعف الجمال الرحمة و حتى ساعات كتير المعصية
لك ابواب كتير بعدد انفاس خلقك
انا بحاول اوصل و انت عارف ف ساعدنى يا رب اوصلك
من اى باب
بس المهم يكون باب رضى
علشان ممكن الواحد بعد ما طول عمره بيدور على النور و لما يعرف سكته و يشوفه يتحرق بيه
انا عاوز الاقيك من سكة رضى
الاقيك و انت راضى عنى و مبسوط بالمشوار اللى ورتهونى و انا اخترت امشى فيه