متصدقهمش يا بحر

متصدقهمش يا بحر
صدقنى كلهم كدابين اللى بيقولو أنهم بيحبوك وبيتوهو فى جمالك
صدقنى إنت مجرد أكلشيه جميل بالنسبة ليهم
قال ايه الواحد منهم يروح يقعد علي شطك شوية
تروح عنه كل همومه
وخلاص الدنيا بقت حلوة
والواحد فيهم بقى أبيض من جوة ومن برة زى ما ولدته الحاجة
فمتصدقهمش يا بحر
الناس كلها بتحبك أنا متأكد من كدة
بس مش بالشكل اللى إنت عايزه
الناس لقوا فيك صورة جميلة ممكن تساعدهم فى صورهم وكتابانهم ورسومهم
الواحد من دول يدوب يقف قدامك دقيقتين خلاص روح الفن نزلت عليه
وبقى بيكاسو و شوقى فى بعض
يا سلام كمان لو رمالوه كام طوبة فى المياه علشان المنظر السينمائى يكتمل
فمتصدقهمش يا بحر
أتحدى واحد من دول قعد على شطك خمس دقائق الساعة واحدة فى عز الصيف
أتحدى واحد ماللى بيتغزلوا فى جمالك وقف علشان يتمتع بجمالك الساعة واحدة بليل فى عز أمشير
إنت عارف لو كلامهم صحيح
كان يبقى كورنيشك مليان صيف شتا ..............بس تعمل ايه فى الناس الناقصة
متزعلش يا بحر
مش إنت السبب صدقنى
إنت طول عمرك زى مانتا
عمرك ما اتغيرت
لأنك مش بشر
هى بس الناس تعبانة شوية من الحياه
عارف إن إنت عندك إكتئاب حاد من كتر ما سمعت شكاوى
بس انت طول عمرك فاتح صدرك لينا
وعمرك ما اتضايقت من اللى بيفضفضولك
إنت بتزعل بس
من اللى شايفينك منظر حلو
أو يقعدو عليك شوية علشان يعملوا نفسهم بني ادمين