الصورة ده صورتها فى مارس 2011 كنت سايق من Nice ل La Ciotat و تهت. المسافة بينهم حوالى 190 كم كنت باخدها فى العادى فى ساعتين من على طريق A51. بس المرة ده تهت و دخلت من طريق جبلى بيعدى على كذه قرية صغيرة و مزارع نبيذ و وصلت الفندق فى La Ciotat بعد 5 ساعات سواقة. الدنيا كانت بتشتى جامد و المرة ده مالقتش عربية صغيرة فاضطريت اأجر عربية كبيرة نسبياً (السفرية اللى قبلها كنت مأجر smart). اللى خلانى أفتكر الصورة ده انى كنت مبسوط قوى يومها انى اكتشفت الطريق ده و شوفت حتت جديدة و البيوت و المزارع و حتى الطريق كان ممتع و مبهج.
صورة منغمشة ل Monte Carlo Casino فى Monaco. المكان ده فى الفخامة المبهجة. احساس الفخامة فيه طبيعى و جميل مختلف عن احساس الفخامة فى قصر الامارات مثلاً او برج العرب اللى الفخامة فيه مصطنعة و مش باحسها متماشية مع المكان و الذوق العام رغم حبى لدبى.
الصورة ده و احنا فى اعلى حتة من Route Des Cretes. نزلت بعدها انا و Evgeny و عتيق خان على مدينة Cassis و ضربنا Bouillabaisse. ده شوربة سمك مشهورة بيها مارسيليا و مناطق جنوب فرنسا عامة.
الصورة ده فى فرنسا برضه بس قبل الصور اللى فوق بسنتين فى نوفمبر 2009 فى مكان حقول برية على طريق A51 جنوب فرنسا.
لارناكا - قبرص مايو 2009. أحيه عاليوم ده. ابتدا فى نيقوسيا عاصمة قبرص اليوم اللى قبليه الساعة 7:30 المغرب و خلص فى لارناكا تانى يوم الساعة 11 الصبح. و اللى حصل ما بينهم ما يتنيسيش :) :)
و أدام افتكرت قبرص اكيد لازم اجيب Art Cafe1900. واحد من احلى الاماكن اللى روحتها. هو عبارة عن دورين. الدور اللى تحت بار لطيف كدة و البارمان اسمه ماريوس راجل خمسينى لابس لبس الكشافة زى العسل و أعد يتكلم و يهزر معانا و الدور اللى فوق مطعم اللى ماسكاه ست لطيفه جدا اسمها ماريا. أكلت فيه أحلى ستيفاديو دقته فى التلات مرات اللى زرت فيهم قبرص . ماريا و ماريوس بيحبو بعض من زمان و عاملين المكان ده علشان يستمعوا و يعبروا فيه عم نفسهم و ليهم موقع حاطين فيه صور و القصة بتاعة المكان http://www.artcafe1900.com.cy/
ليست هناك تعليقات:
إرسال تعليق