-انت ايه احلى و اوحش مرة مت فيها؟
-و انت بتسأل ليه؟
-عادى يعنى
-طب هقولك. بس قولى الاول انت قديم قد ايه؟
-و الله ما طلعتش قديم قوى زى ما كنت فاكر فى الاول. يعنى انا كنت فاكر انى قبل الحب و بعد العدم بحاجة بسيطة بس من العلامات اللى البنت اللى بحبها قالتلى انها شافتها محفورة على قلبى، بيتهيألى انى جيت بعد الحب بكتير و حتى بعد الامل بس اكيد قبل الخيانة.
- ياه. ده انا كمان كنت فكرك اقدم من كده.
-يا سيدى انت اكيد عارف.
---؛
-ها قولى بقى. ايه احلى و اوحش مرة مت فيهم؟
-احلى مرة لما كنت بحارب فى بدر. كنت مصدق قوى و من المرات النادرة اللى قربت فيها من اليقين، لدرجة انى لما شفت الرمح بيترمى عليا و على قد ما كنت زعلان انى مش هاكمل معاهم و هما عددهم صغير بس حسيت انى بقرب من الله كل ما الرمح بيقرب.
-طب و أسوأ مرة؟
- لما كنت عيل عندى 13 سنة و كان عندى سرطان و ابويا و امى كانوا واقفين جنب السرير اللى نايم عليه و كنت حاسس بروحهم بتتسحق و تدبل و انا روحى بتطلع. كانوا من اطيب الناس اللي اتعاملت معاهم لفترة كبيرة.
- طب و مارجعتش شوفتهم تانى؟
-لا. بس انا افتكرت بعد كدة انى قابلت ابويا لما كان صغير مرة بالصدفة بس ماحصلش اي كلام.
- اها. طب انا لازم امشى. سلام.
- سلام. خلى بالك من نفسك.
- ....... ههههههههههه.
- هههههههههههه.