عندما بعث لى طارق برسالة قصيرة

لماذا بعث لى طارق برسالى نصية نصية قصيرة ان محمود درويش قد مات
لا أعلم كل ما كنت أظنه انه سكران فى مكان ما و انا جالس فى مكان اخر و كان نص الرسالة "و مات درويش..كزهر اللوز أو أبعد" و كان ردى عليها برسالة أخرى نصها "حلاوته" على ظن منى انه سكران

و بعدما عدت الى المنزل و اكتشفت الخبر ..............
ما أعرفش ليه اتغيرت..ما اعرفش ليه ما بقتش حاسس بنفس الانتشاء اللى كنت حاسس بيه
نظريا و ايه يعنى ما كلنا هانموت ماهو عبد الوهاب المسير مات و انا فى الاجازة اللى فاتت فى اسكندرية و كنت فعلا زعلان
بس المرادى حاسس احساس مختلف حاسس ان خلاص ان فيه عد تنازلى ابتدا او ابتدا من زمان و انا مكنتش واخد بالى
مش عارف حاسس انه فيه حاجه حصلت من فتره و انا طنشت او من فقدان ايمانى بالقضية كبرت دماغى
مش عارف هيه ايه و لا ايه يعنى اهمية او فرق انى كنت اخد بالى
بس هوه ده اللى انا حاسس بيه
يمكن علشان انا كنت فى وادى تانى بعيد اوى عن المواضيع ده بألى فترهيمكن علشان بقالى فترة بفكر فى مستقبلى و مستقبل ابنى و فى الشغل و فى الحياة الواقعية اللى انا عايشها و اد ايه انا فعلا مبسوط فيها ومع مراتى

يمكن علشان بقيت واقعى جدا و كنت اخدت على نفسى عهد انى ما افكرش فى حاجات ما لهاش حلول
بس مش عارف ليه لما حسيت انه ممكن يكون فيه حلم بعيد مات حسيت الاحساس ده

حسيت احساس ممثل على خشبة المسرح بيمثل دور متقن جدا و مندمج جدا و فجأه واحد من بره المسرح بيطلع و يقول حاجه خارجه عن النص بس بتمس الممثل ده
ساعتها مش هايعرف يعمل ايه
احساسه اتغير
خرج بره المود خلاص
مش هايقدر يكمل المسرحيه
على الاقل الليله ده
يمكن بكره يكون نسى و يعرف يكمل

الله يرحم محمود درويش و يسامحه