الولاد الطيبين

الولاد الطيبين بيحبوا البنات اللى بضفاير
بيحبوا رقتهم و ضحكتهم الصافيه و قلوبهم الخضرا و بيبقوا مستغربين ان لسا فيه قلوب خضرا بالشكل ده

الولاد الطيبين بيقابلوا البنات الحلوين و بيطبوا فى الحب بجد زى المراهقين كل مرة لسبب بس ما بيعرفوش ياخدوا حاجه مش بتاعتهم.

الولاد الطيبين بيحبوا الجمال و الخير لكل الناس و بيحبوا الناس على عيوبهم مش بيبقوا عاوزين يغيروهم بيحبوهم زى ما هما. بس بيدعولهم ربنا انه يهديهم للخير.

الولاد الطيبين عمرهم ما بيكونوا متأكدين فين طريق الخير علشان كده ما بيعترضوش على اى طريق و بيحاولوا يمشوا فيهم كلهم و علطول بيدعوا ان ربنا يهديهم للطريق اللى يقابلهم فيه و هو مبسوط.

الولاد الطيبين ما بيعرفوش يعنى ايه صحاب, هما عندهم اخوات و بس و ممكن كل الناس اللى فى العالم تبقى اخواتهم.

الولاد الطيبين بيحبوا الالوان و الياسمين.

الولاد الطيبين بيبصوا على اللى نايمين معاهم و يتأكدوا انهم بخير, بيقولولهم تصبحوا على خير من قلبهم و بيعدوا فى دماغهم على واحد واحد من اللى يعرفوهم يقولوله تصبح على خير.

الولاد الطيبين قلوبهم لسا رقيقه و لسا بيعيطوا بمنتهى السهولة لما حد بيحبهم يسافر او يفتكروا كلمة فراق.

الولاد الطيبين دايما طول الوقت بيتكلوا مع ربنا و بيحبوا من اسماءه الرحمن.

الولاد الطيبين بيحبوا ربنا
بيسلموا عليه قبل ما يناموا
بيضحكوا من قلبهم لما يبعتلهم اشارة و بيشوفوها

الولاد الطيبين لما بيتعبوا من الدنيا
بيغمضوا عنيهم
و يناموا