مش عارف انا قولت قبل كده ان انا سافرت لبنان و لا لأ انا سافرت تبع الشغل 3 اسابيع كانوا من اجمل الفترات مع عشقى الابدى ل أسكندرية الا ان بيروت طيرتلى عقلى منتهى الجمال و الروح و الطاقة الجميلة المنبعثة من كل حته فى الناس و الشوارع و الناس اللى معلقة سيناريوهات على جدران البيوت و شارع الحمرا و الحيوية اللى فيه هوه و الداون تاون و طبعاً الجبل و شجر الصنوبر الوهمى اللى مغطيه و مزار حريصا اللى لما بتبقى هناك مهما كانت ديانتك تحت تمثال العدرا الابيض الكبير لازم هاتحس بالخشوع
و طبعاً كل ده انا مكنتش اعرفه الا من خلال المجموعة اللى كانت بتحضر معايا الكورس جاد و غسان و جون و موريس و موزين و ميبل و حسين دوول اللى لفيفونى لبنان و جاد ده اللى استاضفنى اكتر من مرة هوه و ميمة مراته بكل الترحاب و الروح المضيافة و غسان اللى اخدنى اخر يوم و لف معايا احد ماجبنا الهدايا و ودانى المكتبة اللى فتحها مع اخوه و ادانى هدايا من هناك للناس اللى فى مصر
جاد لما بعتلة لطمن عليه رد عليه و قالى
we are loosing our country again
غسان من قيمة شهر و نص كده بعتلى عرض باوربيونت عن لبنان و جمالها و الناطق الروعه اللى فيها كان باعتها لأصدقاء ليه فى اوربا كنوع من الترويج السياحى للبلد اللى هما هناك بيحسوا ان ده دور كل واحد فيهم
غسان لقيتو بعتلى عرض باوربيونت اظاهر هوه عملوه طبعاً بعته لكل الناس اللى عندى و اخدت منه مجموعة الصور ده
هناك تعليقان (2):
هاي انا معجبه اوي بافكارك انت فعلا عندك وجهه نظر في الحياه وده قليل اوي بين الشباب دلوقتي بس اعتقد انك محتاج لشويه روحنيات يعني تؤمن بالله بصوره اكبر انا مش عارفاك ومش من حقي ان احكم عليك يمكن تكون اكتر ايمانا بالله مني بس ده مش باين في كلامك انا عايزه افهم منك مفهوم ربنا عندك يعني بيمثلك ايه ومفهوم الايمان والاخره والحساب اعتقد انها تختلف كتير عن مفهومها عندي
انونيموس:
مش عارف ليه حاسس انك حد اعرفه. بس ما علينا مش مهم.
و الله انا شايف ان موضوع الايمان بالله ده مش مزايدة يعنى مفيش حاجة اسمها فلات مؤمن بربنا اكتر من فلان انا مؤمن ان الطريق الى الله بعدد انفاس الخلائق.
فكرى فى الجملة ده و انتى هاتعرفى انا قصدى ايه
سلام
إرسال تعليق