مش عارف الصراحه ازى كان المعنى مهم اوى زى ما الواحد كان فاكر و لا لأ

اصل كل ما يظهر فى الصوره بيظهر معاه علطول القلق و راحة البال و حرب طواحين الهواء و بعد ما كل ده يخلص بيجى الاستسلام و العجز و الضعف

يمكن تكون "مرحلة" و طبعا انا اكتر واحد فى الدنيا بيكره الكلمه الغريبه ده لما تيجى توصف لواحد حالتك مهما كانت و يكون رده الجاهز السريع "ده مرحلة و هاتعدى" و طبعا انت بتتثبت الاول و تعد تحاول تقنعه بالاحساس اللى عندك و تحارب شويه و بعدين بتستسلم او بتزهق ادام اصراره و ثقته لأنه بيوعدك بحاجه فى علم الغيب عندك و علم اليقين عنده و انك هاتبقى مييت فل و اربعتاشر كمان

بس بعد فتره و مع كل مرحلة مابتكملش حاربك فيها للاخر و بتسمع فيها نصحيته بتلاقى انك كسرت كل الايقونات اللى كانت فى حياتك اللى هيا عدت عليك فى "المراحل" المختلفه. يعنى حطمت الوحده و الكابه و الثوره و التمرد و الصداقه و الحلم و الدين و حتى الحب

و بتقعد تفكر فى حالك دلؤتى و بتلاقيك بقيت اكتر اتزانا و حكمه و اقوى كتير من الاول و يمكن يبقى شكلك سعيد كمان عن الاول بس انا و انت بس اللى عارفين الحقيقه.. فخليها فى سرك

سلام