عبث
الاستاذ الدكتور الداعية قاعد الساعة 3 الفجر بيكلمنا عن قصة سيدنا نوح و اللزج مقدم البرنامج بيرجوه انه يربط ما بين افات قوم سيدنا نوح و ما بين الواقع المعاصر و بيفشخ بقه من الدهشه لما الداعية الكبير بيقول ان المركب كانت بتعدى فى وسط الموج مش على الموج !!!! الداعية المصرى العلامة بعد ما خلص البرنامج بتاعوه اللى بيعملوه فى الشارقه مقره الدائم و وطنه الحالى على طول موجز لأهم الانباء مقتل 8 من اسرة واحد فى العراق و جايببين منظر دم الناس و هوه على الارض و مش عارف ولاد ال ... الله ما إنى صائم بقى عمالين بيتاباروا علشان يفرجونا على الدم و بعديها مقتل مش عارف كام و احد كده اللى هما بتوع كل يوم فى فلسطين و برضوا الناس شايلين الجثمان و الله اكبر الله اكبر و تعليقات مختلفه من عباس و هنيه طبعا و مين الشاطر اللى يعرف يستفيد بالموت اكترطبعا و انا كل ده و انا بعمل سحور قدام كل الجمال ده عشان قاعد لوحدى فى دوبى على رأى العيال فى اسكندرية خلصت سحور و انا بقول فعلاً العلماء و الدعاة فعلاً لهم دور كبير قوى فى حياتنا و فكرت اكتب مدونة كالاتى: أكتب فى ما لا يزيد عن 3242349 سطر عن دور الدعاة و اثره فى حياة الفرد و المجتمع
اللهم انقذنا بوجودك من العبث فى الدنيا و من الفناء فى الاخرة
